22/08/2019 زكاة العلم نشرة فلا تبخلو على غيركم info@homefairies.com
0

سلة المشتريات

قصة القفاز The mitten

من الأنشطة الأساسية فى والدروف الحكايات ومن حكايات الشتاء قصة القفاز The Mitten
تنوية الموضوع باللهجة العامية
القصة باللغة الانجليزية وهى من التراث الأوكراني
فى البداية اخترت القصة وترجمتها ( هى أصلا كلماتها بسيطة ) لأنى اخترت أقدمها بالعربى وبعد كدا ابتديت أجهز الشخصيات والى كانت عبارة عن الجدة والحفيدة ( المفروض إنه حفيد بس تماشياً مع كوكب البنات بتاعنا بقى حفيدة) ومجموعة من الحيوانات
واجهتنى عقبة فى الحدوتة إنى عايزه أضيف لها قيمة عشان تكون هادفة ومفيدة فاستشرت الحبيبة هند والتى أضافت لى جزء  دعاء الضالة وهنا زودنا شخصية قزم عشان يذكر البنت إنها تقول الدعاء
وكدا اكتملت الجوانب وخلصت الشخصيات وجه وقت الحدوتة 😍
كان ياما كان كان فى مرة بنت اسمها سلمى عايشة مع جدتها، وفى يوم من أيام الشتاء وهما قاعدين جنب النار بيتدفوا كانت الأرض بره متغطية بتلج بيلمع وجميل التلج غطى كل حاجة حتى الشجر والبيوت الدنيا بقت كلها بيضاء وبتلمع
سلمى وهى بتتفرج على التلج قالت لجدتها أنا نفسى يكون عندى قفاز بيلمع بلون التلج
ضحكت الجدة وقالت بس كدا أكيد هيضيع فى التلج
سلمى قالت لجدتها من فضلك يا تيتة ممكن تعملى لى قفاز بيلمع بلون التلج من فضلك من فضلك
وافقت الجدة وجابت الخيط الابيض والإبر وغزلت لحفيدتها قفاز أبيض بيلمع بلون التلج
فرحت سلمى جدا جدا بالقفاز وشكرت جدتها وبسرعة لبست الجاكيت والايس كاب والحذاء وطبعا القفاز واستأذنت جدتها وخرجت تلعب ؛ جريت ونطت وعملت كرات تلج ورمتها على الأشجار جريت على التلة واتزحلقت من عليها
حاولت تتسلق الشجرة بس ما عرفتش القفاز ما ساعدهاش
فكرت وقررت تقلع القفاز وفعلا قلعته وحطته فى جيبها , تخيلوا إيه الى حصل ؟!
فردة من القفاز وقعت منها على التلج وطبعا سلمى ما اخدتش بالها وكملت لعب وجرى وكانت مبسوطة جدا ومستمتعة
بعد شوية مش كتير جه ( هنا ممكن نستخدم أى حيوانات أنا استخدمت المتاح عندى بحجم صغير) أرنب بينط ويلعب قرب من القفاز الى بيلمع بلون التلج واستغرب يا ترى ايه جواه دخل يشوف لقى  ان جواه دافى وجميل
شوية وجه السنجاب وهو معدى فكر ان القفاز ده شكله مكان لطيف وأكيد دافى من جوة ودخل جوه القفاز هو كمان
كان فى غزالة معدية شافت القفاز وقالت الله شكله مكان مناسب انى ارتاح فيه ( ممكن نقول حيوانات زى ما نحب)
كان فى دب معدى سمع الاصوات وحس ان المكان زحمة بس ما حبش يفضل لوحده فى البرد فدخل هو كمان
كان فى فأر معدى حب يشوف إيه الى جوه القفاز حاول يدخل والمكان زحمه فنط جه على أنف الدب شنب الفأر خلى الدب عايز يعطس اااااااااتشو عطس الدب خلى كل الحيوانات طلعت بره القفاز وطار القفاز فى الهوا
فى الوقت ده كانت سلمى خلصت لعب وعايزة تروح وبتدور على القفاز فى كل مكان مش لاقياه
سلمى كانت حزينة جدا ومضايقة وبتدور على القفاز ومش عارفة تعمل ايه !
قابلها القزم الأصفر سألها مالك حزينة ليه ؟
قالت له انها مش لاقية القفاز بتاعها ؟
قالها طيب قولت دعاء الضالة ؟
ابتسمت سلمى عشان افتكرت وقالت له نسيت وشكرته انه فكرها وابتدت تدور وهى بتقول ” اللهم يا جامع الناس ليوم لا ريب فيه اجمع بينى وبين ضالتى “
بصت لقيت القفاز بتاعها جنب الشجرة فرحت جدا وحمدت ربنا وشكرته
أخدت القفاز ورجعت البيت وأول ما وصلت قالت لجدتها بفرحة أنا رجعت والقفاز ما ضاعش فى التلج
ضحكت جدتها جدا على القفاز الى بقى فردة مقاس سلمى والتانية كبرت جدا جدا جدا جدا
ملحوظة : أنا عملت من القفاز 3 مقاسات لفردة منهم واحد مقاس سلمى وواحدة كبيرة شوية تكفى إنى أدخل فيها الحيوانات وواحدة تانية مقاسها متوسط عشان تنفع ان سلمى تلبسها ومثلنا الحدوتة بالأقزام ومجسمات الحيوانات )
ملحوظة تانية : انا باقرأ القصة أكتر من مرة قبل ما أحكيها وبعد كدا بقول من دماغى ما بارتبطش بالكلام بالضبط باستخدم مفرداتى وباغير طبقة الصوت بين الشخصيات )
وتوتة توتة خلصت الحدوتة

أرسل

لن يتم نشر عنوان بريدك الإلكتروني. الحقول الإلزامية مشار إليها بـ *

منتجات قيمة

زوروا متجرنا واستمتعوا بخصومات و منتجات قيمة

تسوقي معنا